ನಾವೆಲ್ಲರೂ ಬೆಳಿಗ್ಗೆ ಸೂರ್ಯ ಹುಟ್ಟಿದ ಮೇಲೆ ಎದ್ದು ಶಾಲೆಗೆ ತಯಾರಾಗುತ್ತೇವೆ. ಆದರೆ ಹನ್ನೊಂದು ವರ್ಷದ ಬಾಲಕಿ ಶ್ರೇಯೋವಿ ಮಾತ್ರ ಮುಂಜಾನೆ ನಾಲ್ಕೂವರೆಗೇ ಎದ್ದುಬಿಡುತ್ತಾಳೆ! ಅವಳ ಕೈಯಲ್ಲಿ ಪೆನ್ನು-ಪುಸ್ತಕಕ್ಕಿಂತ ಹೆಚ್ಚಾಗಿ ಒಂದು ದೊಡ್ಡ ಕ್ಯಾಮೆರಾ ಇರುತ್ತದೆ. ಹಕ್ಕಿಗಳ ಚಿಲಿಪಿಲಿ ಮತ್ತು ಕಾಡಿನ ಮೌನವೇ ಅವಳ ಪ್ರಪಂಚ.
ಇತ್ತೀಚೆಗೆ ಲಂಡನ್ನ ನ್ಯಾಚುರಲ್ ಹಿಸ್ಟರಿ ಮ್ಯೂಸಿಯಂ ಆಯೋಜಿಸಿದ್ದ 60ನೇ ಸಾಲಿನ ವೈಲ್ಡ್ ಲೈಫ್ ಫೋಟೋಗ್ರಾಫರ್ ಆಫ್ ದಿ ಇಯರ್' (WPY) ಸ್ಪರ್ಧೆಯಲ್ಲಿ ಶ್ರೇಯೋವಿ ಸಾಧಿಸಿದ ಯಶಸ್ಸು ಭಾರತೀಯರೆಲ್ಲರೂ ಹೆಮ್ಮೆ ಪಡುವಂತಹದ್ದು.
ಅಪ್ರತಿಮ ಸಾಧನೆಯ ಹಿನ್ನಲೆ:
ಸುಮಾರು 117 ದೇಶಗಳ ಛಾಯಾಗ್ರಾಹಕರು ಭಾಗವಹಿಸಿದ್ದ ಈ ಪ್ರತಿಷ್ಠಿತ ಸ್ಪರ್ಧೆಯಲ್ಲಿ, 10 ವರ್ಷದೊಳಗಿನವರ ವಿಭಾಗದಲ್ಲಿ ಶ್ರೇಯೋವಿ ದ್ವಿತೀಯ ಸ್ಥಾನ (Runner-up) ಗಳಿಸಿದ್ದಾಳೆ. ಈ ಪ್ರಶಸ್ತಿಯನ್ನು ಛಾಯಾಗ್ರಹಣ ಲೋಕದ 'ಆಸ್ಕರ್' ಎಂದೇ ಪರಿಗಣಿಸಲಾಗುತ್ತದೆ. ಇಷ್ಟು ಚಿಕ್ಕ ವಯಸ್ಸಿಗೆ ಈ ಗೌರವಕ್ಕೆ ಪಾತ್ರರಾದ ಅತೀ ಕಿರಿಯ ಭಾರತೀಯರಲ್ಲಿ ಶ್ರೇಯೋವಿ ಒಬ್ಬಳು.
ವಿಶಿಷ್ಟ ಚಿತ್ರ: 'ಇನ್ ದಿ ಸ್ಪಾಟ್ಲೈಟ್' (In the Spotlight)
ರಾಜಸ್ಥಾನದ ಭರತ್ಪುರದಲ್ಲಿರುವ ಕೇವಲಾದೇವ್ ರಾಷ್ಟ್ರೀಯ ಉದ್ಯಾನವನದಲ್ಲಿ ಶ್ರೇಯೋವಿ ಈ ಅದ್ಭುತ ಚಿತ್ರವನ್ನು ಸೆರೆಹಿಡಿದಿದ್ದಾಳೆ.
ದೃಶ್ಯದ ಸೊಬಗು: ಮುಂಜಾನೆಯ ಮಂಜು ಮುಸುಕಿದ ವಾತಾವರಣದಲ್ಲಿ, ಕಾಡಿನ ಹಾದಿಯ ನಡುವೆ ಎರಡು ಹೆಣ್ಣು ನವಿಲುಗಳು ನಿಂತಿದ್ದವು. ಸೂರ್ಯನ ಕಿರಣಗಳು ಮರಗಳ ನಡುವೆ ಸೋಸಿ ಬಂದು ನವಿಲುಗಳ ಮೇಲೆ ಬೆಳಕಿನ ಹೊನಲನ್ನೇ ಚೆಲ್ಲಿದ್ದವು.
ತಾಂತ್ರಿಕ ನೈಪುಣ್ಯ:
ಈ ಚಿತ್ರವನ್ನು ತೆಗೆಯಲು ಶ್ರೇಯೋವಿ ನೆಲಕ್ಕೆ ಹತ್ತಿರವಾಗಿ ಕುಳಿತು (Low angle), ಬೆಳಕಿನ ಸಮತೋಲನವನ್ನು ಕಾಪಾಡಿಕೊಂಡ ರೀತಿ ವೃತ್ತಿಪರ ಛಾಯಾಗ್ರಾಹಕರನ್ನೂ ಬೆರಗುಗೊಳಿಸುವಂತಿದೆ.
ಯಶಸ್ಸಿನ ಹಿಂದಿನ ಶ್ರಮ ಮತ್ತು ಶಿಸ್ತು:
ಅಂತರ್ಜಾಲದ ಮೂಲಗಳ ಪ್ರಕಾರ, ಶ್ರೇಯೋವಿಯ ಈ ಸಾಧನೆ ಆಕಸ್ಮಿಕವಾದುದಲ್ಲ. ಅದರ ಹಿಂದೆ ಕಠಿಣ ದಿನಚರಿ ಇದೆ:
1. ಮುಂಜಾನೆಯ ಅಭ್ಯಾಸ:
ಶಾಲೆಯ ಓದಿನ ನಡುವೆಯೂ ಆಕೆ ಪ್ರತಿದಿನ ಬೆಳಿಗ್ಗೆ 4:30ಕ್ಕೆ ಎದ್ದು, ಮುಂಜಾನೆ 5 ರಿಂದ 6 ರವರೆಗೆ 'ನೇಚರ್ ವಾಂಡರರ್ಸ್' ಸಂಸ್ಥೆಯ ತಜ್ಞರ ಮಾರ್ಗದರ್ಶನದಲ್ಲಿ ತರಬೇತಿ ಪಡೆಯುತ್ತಾಳೆ.
2. ಪೋಷಕರ ಪ್ರೋತ್ಸಾಹ: ತಂದೆ ಶಿವಂಗ್ ಮೆಹ್ತಾ ಭಾರತದ ಪ್ರಸಿದ್ಧ ವನ್ಯಜೀವಿ ಛಾಯಾಗ್ರಾಹಕರು. ಅವರೊಂದಿಗೆ ಚಿಕ್ಕಂದಿನಿಂದಲೇ ಕಾಡುಮೇಡುಗಳನ್ನು ಅಲೆದದ್ದು ಶ್ರೇಯೋವಿಗೆ ವರವಾಗಿದೆ.
3. ತಾಳ್ಮೆ ಮತ್ತು ಏಕಾಗ್ರತೆ:
ವನ್ಯಜೀವಿ ಛಾಯಾಗ್ರಹಣಕ್ಕೆ ಬೇಕಾದ ಮುಖ್ಯ ಗುಣ ತಾಳ್ಮೆ. ಒಂದು ಅಪರೂಪದ ಕ್ಷಣಕ್ಕಾಗಿ ಗಂಟೆಗಟ್ಟಲೆ ಕಾಯುವ ಗುಣವನ್ನು ಈಕೆ ಮೈಗೂಡಿಸಿಕೊಂಡಿದ್ದಾಳೆ.
ಕಾಡೇ ಅವಳ ಪಾಠಶಾಲೆ:
ಶ್ರೇಯೋವಿಗೆ ಅಕ್ಷರ ಕಲಿಯುವ ಮುನ್ನವೇ ಪ್ರಾಣಿಗಳ ಹೆಸರುಗಳು ಗೊತ್ತಿದ್ದವು. ಅಪ್ಪ ಶಿವಂಗ್ ಮೆಹ್ತಾ ಪ್ರಸಿದ್ಧ ವನ್ಯಜೀವಿ ಛಾಯಾಗ್ರಾಹಕರು. ಅಪ್ಪನ ಜೊತೆ ಕಾಡಿಗೆ ಹೋಗುವುದೆಂದರೆ ಶ್ರೇಯೋವಿಗೆ ಎಲ್ಲಿಲ್ಲದ ಸಂಭ್ರಮ. ಎರಡು ವರ್ಷದ ಮಗುವಾಗಿದ್ದಾಗ ಆಕೆ ಮೊದಲ ಬಾರಿಗೆ ಅಪ್ಪನ ದೊಡ್ಡ ಕ್ಯಾಮೆರಾವನ್ನು ಮುಟ್ಟಿದ್ದಳು. ನಾಲ್ಕು ವರ್ಷದವಳಿದ್ದಾಗ ಆಟದ ಸಾಮಾನುಗಳ ಬದಲು ಅವಳ ಕೈಗೆ ಬಂದಿದ್ದು ಒಂದು ಪುಟ್ಟ ಕ್ಯಾಮೆರಾ! ಅಂದಿನಿಂದ ಶುರುವಾಯಿತು ನೋಡಿ ಈ ಪುಟ್ಟ ಹುಡುಗಿಯ ದೊಡ್ಡ ಸಾಹಸ.
ಮಕ್ಕಳಿಗೇಕೆ ಈಕೆ ಮಾದರಿ?
ಶ್ರೇಯೋವಿ ಕೇವಲ ಫೋಟೋಗಳನ್ನು ಕ್ಲಿಕ್ಕಿಸುವುದಿಲ್ಲ, ಬದಲಾಗಿ ಪ್ರಾಣಿ-ಪಕ್ಷಿಗಳ ನಡವಳಿಕೆಗಳನ್ನು (Animal Behaviour) ಅಭ್ಯಸಿಸುತ್ತಾಳೆ. ಪರಿಸರ ಸಂರಕ್ಷಣೆಯ ಬಗ್ಗೆ ಈ ಚಿಕ್ಕ ವಯಸ್ಸಿನಲ್ಲೇ ಅವಳಿಗಿರುವ ಕಾಳಜಿ ಮೆಚ್ಚುವಂತದ್ದು. ಹವ್ಯಾಸವನ್ನೇ ತಪಸ್ಸನ್ನಾಗಿ ಸ್ವೀಕರಿಸಿದರೆ ಎಂತಹ ಉನ್ನತ ಶಿಖರವನ್ನು ಏರಬಹುದು ಎಂಬುದಕ್ಕೆ ಶ್ರೇಯೋವಿ ಸಾಕ್ಷಿಯಾಗಿದ್ದಾಳೆ.
"ಛಾಯಾಗ್ರಹಣ ಎನ್ನುವುದು ಕೇವಲ ಚಿತ್ರ ತೆಗೆಯುವುದಲ್ಲ, ಅದು ನಾವು ಪ್ರಕೃತಿಯನ್ನು ನೋಡುವ ದೃಷ್ಟಿಕೋನ" ಎಂಬ ಮಾತನ್ನು ಶ್ರೇಯೋವಿ ನಿಜವಾಗಿಸಿದ್ದಾಳೆ. ಲಂಡನ್ನ ವಸ್ತುಸಂಗ್ರಹಾಲಯದಲ್ಲಿ ಈಕೆಯ ಚಿತ್ರ ಪ್ರದರ್ಶನಕ್ಕಿಡುತ್ತಿರುವುದು ಭಾರತೀಯ ವನ್ಯಜೀವಿ ಪ್ರೇಮಿಗಳಿಗೆ ಸಿಕ್ಕ ದೊಡ್ಡ ಗೌರವ.
ಡಾ. ಪ್ರಸನ್ನ ದೇವರ ಮಠ ಅನಿಲಕುಮಾರ್, ಮಾಗಳ
ಪದವೀಧರ ಪ್ರಾಥಮಿಕ ಶಿಕ್ಷಕರು
ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ, ಮುದೇನೂರು,
ಹೂವಿನಹಡಗಲಿ, ವಿಜಯನಗರ ಜಿಲ್ಲೆ
